قصيدة سلاك المغبون -الشاعر محمد بلخير

سَـلاَّكْ الْمَـغْـبُـونْ مَـنْ أَرْضْ الْـقِـفَـارْ		*		قَـادَرْ كُـلْ غْـرِيـبْ لَـبْـلاَدُه تَـدِّيـهْ
فَرَّجْ يَا رَبِّي عْلَى مَنْ ذَاقَتْ بِهْ
سَـلَّكْـنِي مَـنْ بِينْ سَـدْ وُ صَـدْ حْـجَارْ	*		يْـشُـوفْ الْمَـغْـبُونْ لَـكَـانْ بْـعَيْـنِيـهْ
سَـلَّكْنِي مَنْ ضِيقْ الاَعْـرَى مْـنَ التَّـزْيَارْ	*		قَـادَرْ تَـبْـنِـي الرِّيـحْ وَ الْكَـافْ تْوَطِّـيهْ
سَـلَّكْـتْ ابْـرَاهِـيمْ مَنْ لَـهْفَـاتْ النَّـارْ	*		بَــرْدًا وَ سَـلاَمْ حَـاجَـة مَـا تَــاذِِيـهْ
رَزْقََـكْ وَ امْـرَكْ مَا عْلَمْـنَا لِيهْ اخْـبَـارْ	*		قَـادَرْ تَـفْنِي الْحَـيّْ وَ الْمَـيَّـتْ تَـحْيِِيـهْ
الْعَـبْدْ الضَّـعِيفْ مَـا طَـايَڤْ لَـضْـرَارْ	*		هَـمّْ الْحَـبْـسْ وُ زَادْ هَـمّْ الضُّـرّْ عْـلِيـهْ
الـطَّـيَّـبْ لَـلـنَّـاسْ لِـيَ رَاهْ مْـرَارْ	*		الشَّـكْـوَة لَـلِّي خْـلَـقْـنِي لاَ غَـيْـرِيـهْ
تْــعَــزّْ الْـمَـذْلُـولْ وَ تْـذَلْ الْـڤُـدَّارْ	*		وَ تْـنَـزَّلْ مَنْ كَـانْ مَـرْفُـوعْ بْـجَنْحِـيهْ
قَـوِيٌّ وَ مَـتِــيـنْ شَـبَّـابْ الِّـي بَـارْ	*		رَزْقِـي وَ الْمَـكْـتُوبْ وَ الْقُـدْرَة بِيـدِيـهْ
سَـلَّكْـنِي مَنْ بِينْ الاَقْـرَاسْ وُ الاَشْـفَـارْ	*		تَـاتِـنـي بَـشْـبُـوبْ عَـزّْ الاَّ نَـدْرِيـهْ
سَـهَّـلِّـي يَا خَـالْـقِـي فِـيمَا نَـخْـتَارْ	*		حَـبْـسْ الْغُـرْبَة لاَ تْـخَـلِّي وَاحَـدْ فِـيهْ
أَهْـلْ الْخِـيرْ بْـلاَ جْـمِيلْ وُ لاَ تَـفْخَـارْ	*		كِـي وَلْـدْ ابْـرَاهِـيـمْ مُـحَمَّـدْ نَـجِّيـهْ
رَضِّـي عَـنُّه بُـوهْ بَـنْ عَـبْدْ الْجَـبَّـارْ	*		بَـاوْلاَدُه وَ جْـمَاعْـتُـه رَبِّـي لَـقِّـيـهْ
سَـهَّـلِّي يَـا خَـالْقِـي فِـيمَـا نَـخْـتَارْ	*		ڤَـلْبِي يَـبْغِي غِـيرْ مْـنَ الْبَـيَّضْ وَ لْـهِيهْ
نَـتْـنَـزَّهْ فِـي صَـحْـرَةْ بْـلاَدْ الْقِـفَـارْ	*		نْـشُـوفْ اسْـيَـادِي اهْـلْ النِّـيفْ مُّـالِيهْ
مَـنْ عَـنْـدْ الْمَحْـبُوبْ مَا جَـانِي بَـشَّارْ	*		عَـجَّـلْ يَـا رَبِّي يْجِـينِي وَ الاَّ نْـجِـيـهْ
مُـولَـى سَـبْعْ ڤْـبَابْ مَـرْكَاحْ الزَّيَّـارْ	*		مُـولَـى السَّـرّْ الظَّـاهَـرْ عْـلِيَ رَضِّـيهْ
مَـا بِـيَّـاشْ الْحَـبْـسْ بِيَ عَـيْبْ وُ عَـارْ	*		وَ يْـڤُـولُـوا هَـذَا بْـسِيـدُه وَ سْـمَحْ فِـيهْ
مُـحَمَّـدْ بَالْخَـيْـرْ عَـبْـدْ بْـلاَ تَـحْـرَارْ	*		نَـحْسَـبْ سِـيـدْ الشِّـيـخْ لِيَ وَانَـا لِـيهْ
يَا حَـسْـرَاه رْفَـاڤْـتِي وَ حْـنَـا هُـجَّـارْ	*		وَثْـرَنْ دُرْكْ النَّـاسْ غِـيـرْ أَنَـا نَـبْـغِيهْ
يَا حَـسْـرَاهْ عْـلَـى سْـمَاحَـتِي الاَحْـرَارْ	*		يُـومْ انْ غَـابْ رْفِيڤْـهُمْ مَا حَـارُوا فِـيـهْ
يَا حَـسْـرَاهْ عْـلَـى مْـلاَعَبْ فِي الاَڤْـوَارْ	*		مَـشْلِيَـة مَـنَّـا وُ مَـشْـلِـيَـة مَـلْهِيـهْ
نَـبَّاشِيـنْ الْخَـيْـلْ بَـشْـبُورْ التَّـسْـطَارْ	*		وَ لْـبَـاسْ الْهَـمَّـة الْمَـجْـبُودْ يْـوَاتِـيهْ
يَا حَـسْـرَاهْ عْـلَى نْـڤَـارْ ڤْـبَـالْ نْـڤَارْ	*		كَـذَا مَنْ قَـبْـطَـانْ بَـعْـلاَمُـه طَـوِيـهْ
يَا حَـسْـرَاهْ مْـنِيـنْ كَانْ الشَّـطْ عْـبَـارْ	*		الْمَـغْـلُوبْ يْـفُـوتْ حَـقَّـهْ وَ يْـخَـلِّيـهْ
يَا حَـسْـرَاهْ مْـنِيـنْ سَـلْسَـلْـنَا الْڤُـدَّارْ	*		كَـانْ الْعَـزّْ الاَّ مْـنَ الْبَـيَّـضْ وَ لْـهِيـهْ
يْـجِي يُـومْ حْـلُـو وُ يُـومْ ڤْـبَالُـه حَـارْ	*		وَ يْـجِي يُـومْ عْـدُو وُ الاَخُـرْ نَـزْهُوا فِيهْ
أَمْـرَ الله قْـرِيـبْ وَ يْـدُورْ الْمَـشْــوَارْ	*		رَبِّـي قَـالْ الظَّـانَّـهْ عَـبْـدِي نُـوفِـيـهْ
نَـتَّـنُـوا الاَيَّـامْ وَ الْـفَـلْـكْ إِذَا دَارْ	*		بِـيـنْ الْكَـافْ وُ نُـونْ شَانْ الله يَقْـضِيـهْ
نَـرْجُـوا نَـوْبَتْنَـا وُ تَـتْبَـدَّلْ الاَسْـعَـارْ	*		بْــجَـاهْ الرَّسُــولْ مُــحَـمَّـدْ نَـبِيـهْ
بْـجَـاهْ الرَّسُـولْ وَ اصْـحَـابُـه الاَبْـرَارْ	*		بُـوبَـكْـرْ الصِّـدِّيـقْ وَ الْمُـصَـدَّقْ بِـهْ
فَى السَّـابَـقْ رَانِي رْمِـيـتْ عْـلِيهْ الْعَـارْ	*		نَـسْـتَنَّى فَى الْجَـارْ الاَيْـمَـنْ نْـسَامِيـهْ
أَغْـفَـرْ يَـا غَـفَّـارْ لاُمَّـةْ الْمُـخْـتَـارْ	*		الْـعَـبْـدْ إِذَا تَـابْ تَـابْ الله عْـلِـيـهْ
سَـلَّكْـنَا مَـنْ هَـوْلْ ذِيـكْ وُ هَـذَا الـدَّارْ	*		فِيَ ذَنْـبْ كْـثِـيـرْ يَـاسَـرْ مَا نَحْـصِيـهْ
يَـا حَـلِيـمْ وُ يَـا كْـرِيـمْ وُ يَـا سَـتَّـارْ	*		أَسْـتُـرْ عَـيْبِي مَـا عْـلَـمْ حَـدّْ نْـوَرِّيهْ
أَغْـفَـرْ يَا غَـفَّـارْ لَـجْمِيـعْ الْحُـضَّـارْ	*		لَـلـنَّـاظَـمْ الاَشْـعَـارْ وَ لِـوَالِـدِيـهْ
تَمَّتْ